गडचिरोली-चामोर्शी मार्गावर कुनघाडा गावाजवळ अपघातग्रस्ताला स्वतःच्या वाहनातून उपचारासाठी पाठवले
राकेश तेलकुंटलवार/उपसंपादक
गडचिरोली/चामोर्शी, दि. ३० सप्टेंबर : महत्त्वाच्या बैठकीसाठी गडचिरोलीहून चामोर्शीकडे जात असताना रस्त्याच्या कडेला अपघातग्रस्त अवस्थेत पडलेल्या अनोळखी तरुणाला पाहून लॉयड्स मेटल्सचे बलराम उर्फ भोलू सोमनानी यांनी तातडीने मदतीचा हात पुढे केला. वेळेची घाई आणि महत्त्वाची बैठक असतानाही त्यांनी स्वतःचे काम बाजूला ठेवत अपघातग्रस्ताला वैद्यकीय उपचारासाठी रवाना केले.
मिळालेल्या माहितीनुसार, भोलू सोमनानी हे एका महत्त्वाच्या बैठकीसाठी गडचिरोलीहून चामोर्शीकडे जात होते. कुनघाडा गावालगत पोहोचले असता रस्त्याच्या कडेला एक तरुण अपघातग्रस्त अवस्थेत पडल्याचे त्यांच्या निदर्शनास आले. संबंधित व्यक्ती बराच वेळ मदतीच्या प्रतीक्षेत असल्याचेही सांगण्यात आले.
परिस्थितीचे गांभीर्य लक्षात घेत सोमनानी यांनी क्षणाचाही विलंब न करता आपले वाहन थांबवले. बैठकीची वेळ आणि स्वतःची जबाबदारी महत्त्वाची असतानाही त्यांनी प्रथम अपघातग्रस्ताला मदत मिळणे आवश्यक असल्याचे मानून त्याच्यासाठी स्वतःचे वाहन उपलब्ध करून दिले. त्यानंतर जखमी व्यक्तीला वैद्यकीय उपचारासाठी सुरक्षितपणे रवाना करण्यात आले.
अपघाताच्या वेळी वेळेत मदत मिळणे अत्यंत महत्त्वाचे असते. अशा परिस्थितीत अनेकदा लोक मदतीसाठी पुढे येण्यास संकोच करतात. मात्र, सोमनानी यांनी स्वतःची घाई आणि महत्त्वाचे काम बाजूला ठेवून मदतीला प्राधान्य दिल्याने त्यांच्या या कृतीचे परिसरात कौतुक होत आहे.
पद किंवा जबाबदारीपेक्षा संकटात सापडलेल्या व्यक्तीच्या मदतीला धावून जाणे महत्त्वाचे असल्याचा संदेश त्यांच्या कृतीतून मिळाला. त्यांच्या या संवेदनशीलतेचे आणि तत्परतेचे स्थानिकांकडून कौतुक केले जात आहे.
Tags:
मदत