चामोर्शी शिवसेना तालुकाप्रमुख पप्पीभाऊ पठाण यांची मागणी;.. प्रवाशांच्या गैरसोयींकडे प्रशासनाचे लक्ष वेधले
तालुका प्रतिनिधी चामोर्शी:-
चामोर्शी शहरातील गेल्या अनेक दिवसांपासून प्रतीक्षेत असलेल्या नवीन बसस्थानकाचे बांधकाम जवळपास पूर्णत्वास आले असतानाही अद्याप त्याचे अधिकृत लोकार्पण झालेले नाही. त्यामुळे नवीन बसस्थानक प्रवाशांच्या सेवेसाठी नेमके कधी सुरू होणार, असा प्रश्न चामोर्शी तालुक्यातील नागरिक व प्रवाशांकडून उपस्थित केला जात आहे. सद्यस्थितीत मुख्य रस्त्यालगत हायवेवर असलेल्या छोटेखानी बसथांब्यामुळे प्रवाशांची मोठी गैरसोय होत असून, नवीन बसस्थानकाचे लोकार्पण तातडीने करून ते प्रवाशांसाठी खुले करावे, अशी मागणी चामोर्शी शिवसेना तालुकाप्रमुख पप्पीभाऊ पठाण तसेच तालुक्यातील नागरिकांनी केली आहे.
चामोर्शी शहर हे तालुक्याचे प्रमुख ठिकाण असून विविध गावांमधून दररोज मोठ्या संख्येने नागरिक, विद्यार्थी, महिला, ज्येष्ठ नागरिक व कामानिमित्त प्रवास करणारे नागरिक येथे ये-जा करतात. सध्या बससेवेसाठी मुख्य रस्त्यालगत असलेल्या छोटेखानी शेडचा वापर करावा लागत आहे. या ठिकाणी प्रवाशांसाठी आवश्यक त्या मूलभूत सुविधा उपलब्ध नसल्याने उन्हाळ्यात कडक उन्हात, तर पावसाळ्यात पावसात प्रवाशांना बसची प्रतीक्षा करावी लागत आहे.
विशेषतः महिला, लहान मुले आणि ज्येष्ठ नागरिकांना सध्याच्या बसथांब्यावर अनेक अडचणींचा सामना करावा लागत असल्याचे नागरिकांचे म्हणणे आहे. बसची वाट पाहण्यासाठी पुरेशी जागा, बसण्यासाठी व्यवस्था तसेच इतर आवश्यक सुविधा उपलब्ध नसल्यामुळे प्रवाशांना गैरसोयीला सामोरे जावे लागत आहे. त्यामुळे शासनाच्या निधीतून उभारण्यात आलेले नवीन बसस्थानक लवकरात लवकर प्रवाशांच्या सेवेत दाखल करणे आवश्यक असल्याचे नागरिकांनी म्हटले आहे.
नवीन बसस्थानकाचे बांधकाम जवळपास पूर्ण झाले असून, त्याचा उपयोग प्रवाशांना सुरक्षित व सोयीस्कर प्रवासासाठी व्हावा, अशी अपेक्षा नागरिकांकडून व्यक्त होत आहे. मात्र, बांधकाम पूर्णत्वाच्या मार्गावर असतानाही लोकार्पणास विलंब होत असल्याने नागरिकांमध्ये नाराजी व्यक्त होत आहे.
“नवीन बसस्थानकाचे काम जवळपास पूर्ण झाले आहे. सध्याच्या बसथांब्यावर प्रवाशांना कोणत्याही सुविधा मिळत नसल्याने त्यांना उन्हातान्हात बसची वाट पाहावी लागते. त्यामुळे नवीन बसस्थानकाचे लोकार्पण कोणताही विलंब न करता तातडीने करून ते नागरिकांच्या सेवेसाठी खुले करावे,” अशी मागणी शिवसेना तालुकाप्रमुख पप्पीभाऊ पठाण यांनी केली आहे.
चामोर्शी तालुक्यातील नागरिकांच्या दैनंदिन प्रवासाशी संबंधित हा प्रश्न असल्याने संबंधित प्रशासन व परिवहन विभागाने याची तातडीने दखल घेऊन नवीन बसस्थानकाचे लोकार्पण करण्याची प्रक्रिया पूर्ण करावी, अशी मागणी जोर धरत आहे. नवीन बसस्थानक सुरू झाल्यास प्रवाशांना निवारा, सुरक्षितता आणि अधिक चांगल्या प्रवासी सुविधा उपलब्ध होण्यास मदत होणार आहे.
त्यामुळे प्रशासनाने विलंब न करता नवीन बसस्थानकाची आवश्यक कामे व प्रशासकीय प्रक्रिया पूर्ण करून तातडीने लोकार्पणाची तारीख निश्चित करावी आणि बसस्थानक प्रवाशांच्या सेवेत सुरू करावे, अशी मागणी पप्पीभाऊ पठाण यांच्यासह चामोर्शी तालुक्यातील नागरिकांनी केली आहे.