राष्ट्रीय क्रीडा दिनानिमित्त महात्मा ज्योतिबा फुले कला महाविद्यालयात मार्गदर्शन; विद्यार्थ्यांना व्यायाम, योग, आहाराचे महत्त्व पटवून दिले
आष्टी : “विद्यार्थ्यांनी खेळाला आपल्या जीवनाचा अविभाज्य भाग बनवावे. दैनंदिन जीवनात खेळ आणि व्यायामासाठी विशेष वेळ द्यावा,” असे आवाहन महात्मा ज्योतिबा फुले कला महाविद्यालयाच्या प्राचार्य डॉ. अनिता लोखंडे यांनी केले.
महात्मा ज्योतिबा फुले कला महाविद्यालयातील शारीरिक शिक्षण विभाग, खेलो इंडिया धनुर्विद्या सेंटर आष्टी, समाजशास्त्र विभाग व विद्यार्थी विकास विभाग यांच्या संयुक्त विद्यमाने राष्ट्रीय क्रीडा दिनानिमित्त विशेष कार्यक्रमाचे आयोजन करण्यात आले होते. यावेळी त्या विद्यार्थ्यांना मार्गदर्शन करताना बोलत होत्या.
कार्यक्रमाच्या अध्यक्षस्थानी प्रा. डॉ. भारत पांडे होते. प्रमुख मार्गदर्शक म्हणून प्राचार्य किशोर पाचभाई, प्रा. डॉ. गणेश खुणे, प्रा. डॉ. रवी शास्त्रकार आणि प्रा. हर्षा पिसे उपस्थित होते.
यावेळी मान्यवरांनी विद्यार्थ्यांना आरोग्याचे महत्त्व समजावून सांगताना खेळ, नियमित व्यायाम, योग, संतुलित आहार आणि पर्यावरण संवर्धन यांचा निरोगी जीवनशैलीशी असलेला संबंध विविध उदाहरणांच्या माध्यमातून स्पष्ट केला. शारीरिक आरोग्याबरोबरच मानसिक स्वास्थ्यासाठीही नियमित व्यायाम व खेळ आवश्यक असल्याचे मार्गदर्शन करण्यात आले.
आजच्या धावपळीच्या जीवनशैलीत विद्यार्थ्यांनी मोबाईल व इतर डिजिटल साधनांचा अतिवापर टाळून मैदानी खेळांकडे वळण्याची गरज असल्याचेही यावेळी सांगण्यात आले. निरोगी विद्यार्थी घडल्यास निरोगी समाज आणि सशक्त राष्ट्रनिर्मितीला हातभार लागतो, असा संदेश कार्यक्रमातून देण्यात आला.
कार्यक्रमाचे प्रास्ताविक प्रा. डॉ. श्याम कोरडे, शारीरिक शिक्षण विभाग यांनी केले. राष्ट्रीय क्रीडा दिनाच्या निमित्ताने विद्यार्थ्यांमध्ये क्रीडा, व्यायाम व आरोग्याविषयी जागरूकता निर्माण करण्यासाठी आयोजित करण्यात आलेल्या या कार्यक्रमाला महाविद्यालयातील विद्यार्थी व संबंधित विभागातील मान्यवरांची उपस्थिती होती.
खेळातून आरोग्य, शिस्त आणि आत्मविश्वास
खेळ हा केवळ मनोरंजनाचा प्रकार नसून तो विद्यार्थ्यांच्या व्यक्तिमत्त्व विकासाचा महत्त्वाचा घटक आहे. खेळामुळे शारीरिक तंदुरुस्तीबरोबरच शिस्त, संघभावना, नेतृत्वगुण आणि आत्मविश्वास वाढण्यास मदत होते. त्यामुळे प्रत्येक विद्यार्थ्याने आपल्या दैनंदिन दिनचर्येत खेळ व व्यायामाला स्थान द्यावे, असा सूर कार्यक्रमातून व्यक्त करण्यात आला.
Tags:
शिक्षण विभाग